Anatomi:Rajmonda Qose Shkopi

Anatomi

Duart ,

zgjatime kryqëzimesh,

që rreken të prekin palcën qiellore.

Trupi ,

një pemë me rrënjët ngulur thellë në tokën amënore,

Mendimet,

herë shpërndarë në hapësirë si tis mjegullnaje,

kur qyteti vishet me agim,

Herë në rrjeta merimange ngecur,

duke u orvatur më kot të gjejnë shpëtim.

Zemra,

pulëbardhë që shqyen kraharor,

sa herë ndjen dhimbje për ata që s’ditën të falin,

Në emër të Dashurisë si më i bukuri Shenjtor.