BUZË BISTRICËS…
————————–
Buzë Bistricës me shelgjishte
Vinin bashkë me dallëndyshet .
Romët që s’ankohen kurrë .
Ju të bukurit , të mirët ,
Ju të qeshurit , të dlirët .
Prisnit degë e zgjidhnit shufra ,
I zbutnit në ujë me tufa .
Thurnit shporta dhe kanistra ,
Si mbi tela loznin gishtat .
Thur e thur shtoheshin koshat ,
Ëngjëjt flinin mbi rogoza .
Me llaut e me gërnetë ,
Qanin hallet nëpër netë .
Vajzë rome ardhur shpejtë ,
Si rrushi ” Merlot” në vreshtë .
Do t’i blej, moj , unë të gjitha ,
Shporta,kosha dhe kanistra .
Qebapët me bisht të gjatë ,
Të pjek kafe e bukë në saç .
Vish çitjanet frutha – frutha ,
Mjeri unë që dot s’të putha .
U përkule si purteka ,
Dy kokra pa thyer dega .
I fshehe kur doli hëna ,
Të pashë si të kish bërë nëna .
Dhe Bistrica nën shelgjishte
Hiqte valle pogonishte .
Uji i blertë u shkumëzua ,
Pestrof’ e egër u zgjua .
Hënë e yje u thërmuan ,
Flokë dhe qerpikë mbuluan .
Hyrë në çadër ,mos u druaj
Ku ishe ti mos u thuaj .
Mbaj në duar shportën tënde ,
Të kërkoj ëndërr pas ëndrre .
Moj bleroshja jonë Bistricë ,
Të lotojnë shelgjet si sytë .
Sytë e romes të shkëndijtë ,
Kryet ngre e rrëzon yjtë .
Dëgjoj dajren që kumbon ,
Majë gishtash fluturon .
Po ku vatë malli më mori ,
Ju kërkoj poshtë nga Bigori .
Në Pyrgos , thonë , dhe Athinë ,
Të gjithë bashkë si në Delvinë .
I zbraza kujtimet sot ,
Borzilok mbete në shportë .
Ah, ju romët nëpër botë ,
Dashuri , gëzim e lotë .
Dhe një rotë prapë ju bashkon ,
Mes flamurit rrezaton ……
&*&*&*&*&*&*&*187&*&*&*&*&*&*&*&*&
