Ç’ËSHTË JETA?
Një detyrim brezash për të lënë pasardhës
fillimi dhe fundi i çdo gjallese,
e lirë kur dëgjon këmbanat e paqes
e ëmbël kur agon e ngryset me buzëqeshje.
Një lëmsh i ndërlikuar peri
e në fije të perit varet,
me të qarë fillon te djepi
me vaje përcillet në varre.
Një mbishkrim mbi pllakën e varrit
me vitet e lindjes e vdekjes shkruar,
mes numrash jeta për së gjallit
përreth vepra për t’u kujtuar.
