JAM FANAR
Më rrëzuan, por s’jam vrarë
N’greminë m’gjuajtën, por s’u mbyta
Sa jam e fortë kurrë s’e dita.
M’fikën dritën që mos t’shoh
M’ndalën zjarrin që mos t’më ngroh
Me çfarë patën më sulmuan
Por s’ia arritën, s’më poshtëruan.
Shembën urën e më vunë mur
Por prap jam më e fortë se kurrë.
NËPËR DRITËHIJE
Është ndjenjë
Janë fjalë
Thurur në vargje
Në poezi
Janë nota
Qëndisur në pentagram
Është këngë
Me të bukurën melodi
S’është enigmë
Por është jetë
Që vetëm poeti
E ndien në thellësi.
SHTHURJE
Bëri çdo gjë që mundi
Fyu, përbuzi
Mashtroi, lëndoi
Flladitej nën hijen e tjetërkujt
Bënte koktej
Me djersën e vjedhur
E lotët ujvarë
Me ndjenjat
Mbyllur në sirtar
Bëri, e çka nuk bëri?
Një ditë
Kur iu kthyen këto të bëma
U bë sikur u pendua
Por vonë
Kur ai, tashmë
Thoshte se ishte penduar
Dielli për të kishte perënduar.
