Ç’MË ZURI NJË DREQ SHI
Ç’më zuri një dreq shi:Bilbil Murataj
Në të perënduar,
Pa rënë nata fare,
Dola të takoja
Shelegen manare.
@
Një shi i rrëmbyer
Filloi të bjeri,
S’kisha gjë me vete,
U laga, i mjeri
@
Të ftohtin s’e ndjeva,
Këmbët i nxitova,
Mos mërzitej mikja,
Pse unë u vonova.
@
Sa më shumë ngrysej,
Më shumë nxitoja,
Në dritë të rrufeve
Rrugën e shikoja.
@
Mikja po më priste,
Sa orë nuk e di,
S’më mori inat,
Më mori në gji.
@
Ashtu përqafuar,
Ndenjëm shumë gjatë,
Vajta qull i lagur,
U ktheva i thatë.
@
Lagështinë që pata
Në rrobat e mia,
Ma kish tharë mikja,
Veç nga dashuria.
@
Dashuria s’njeh
As rrufe, as shi,
Kur dy zemra duhen
Çlirojnë nxehtësi.
