Myrteza Mara
Syrit mos i ngrini lotin,
Pemëve mos ua nxini stinët;
Zemrës mos i ndillni mortin,
Diellit mos i zini dritën,
Gojës mos i prisni fjalën;
Pyllit mos ia digjni frikën,
Frikës mos i vishni djallin,
Fushës mos i fikni verën,
Zogut mos ia vrisni këngën;
Malit mos ia ndalni erën,
Detit mos i vrisni ëndrrën.
Ju, të eturit për gjak,
Ç’qumësht nëne keni pirë?
Mos e ndizni botën flakë,
Edhe paqen me zinxhir.
Sepse koha ka një ligj,
Ka dhe bojë historia;
Lot i popujve është gjyq,
I bekuar nga Perëndia.
