Dita thotë se ka ndërmend të vizatojë
një ëndërr, që shtrihet mëkrahëzaj
për t’u prehur
në një lëndinë të mbushur me sy drerësh. Thotë se do të vizatojë
edhe një prostitutë, e cila shtyn
një karrocë ngjyrë ndryshku
me një djall lakuriq brenda.
Duke tundur kokën e saj nazike,
ngaqë peneli nuk i bindet,
Dita nis të vizatojë
ca dhelpra, që sodisin botën
nga Sheshi i Piedestaleve të Hershme. Duke psherëtirë,
vizaton një fustan të bardhë, që rrëshqet mbi një xham gjigant përkrah dy këmbësh të enjtura.
Sekush i pëshpëriti në vesh se ajo po nxin realitetin,
ndaj nxiton të mbushë kanavacën
me ngjyra lumturie,
duke lënë pakëz (fare pakëz) vend
për pikëpyetjet.
