Fatmir R Gjata-Sa herë


Sa herë

Sa herë jemi kthyer në atdhe

Kemi thënë të njëjtën gënjeshtër

Do të vijmë të jetojmë këtu edhe ne

Edhe shpresa na mbetet në eshtër.

Sa herë jemi gjendur tek dera

Kemi treguar gjithfarë historish

Do të mbetet e hapur përhera

Edhe dhimbja na hyn drejt në mish.

Sa herë kemi shkuar drejt detit,

me valixhe të rënda në duar

Se të vraka kjo rrugë e kurbetit,

pa pushim duke fsharë e mallkuar.

Fluturojmë nëpër dhera të tjerë,

nëpër qiej të mbushur me shi

Dhe e shohim të lodhur të bjerë,

nga oblotë duke parë me mërzi.

Dhe shtëpitë i lamë mbyllur me dryn,

me gjithë plaçkë e kostum dhëndërrie

Vetëm erë në oborret zë shfryn,

edhe fshihet diku nën një hije.

About Post Author