Fatmir R Gjata:Le të jemi fije


Fatmir R Gjata

Le të jemi fije

Nëse jetë është shkrepse le të bëhem fije

Të bëj dritë një çast, dritë prej perëndie

Pastaj le të zhdukem e në mbeç i zi

Do të shkoj të shoh veten ku ndeza qiri.

Me qirinë e ndezur me flakë që luhat

Do ndez ca të tjerë, le t’më thonë lugat

Do t’i marr në dorë e do shkoj në krye

Në natën e zbehtë pa hënë e pa yje.

Ndaj dilni të gjithë në mbrëmje pa orë

Gjindje, mëkatarë, të shënjtë e dashnorë

Nëpër rrugë të madhe që s’di se ku nxjerr

Mbase në parajsë o mbase në ferr.

Të shkëmbejmë e japim, njëri tjetrit flakë

Të ndriçojmë trupin e të ngrohim gjak

Të flasim gjer vonë për paqe e pishtar

Le të thonë të tjerët që jemi të marrë.

About Post Author