Fjala e mirë është argjend-Petrit Qori


Fjala e mirë është argjend ,

por vepra e mirë është flori .

Fruta kam mbi tavolinë ,

një do ha për qefin tim .

Plasi zhurmë e gjullurdi ,

cili frut të bjerë në sy ,

si ushtarakët në hierarki ,

rresht u vunë për madhësi ,

demostruan para e prapa ,

si modelet në sfilata .

– unë jam frut me namuz ,

as shalqi , as karpuz ,

plot me lëng e ëmbëlsi ,

bostan , emri im i ri .

Pas bostanit tha dy fjalë ,

pjepri , kushëriri i parë :

– kush i ka mu si pepon ,

s’ka nevojë për silikon .

Një e gjatë dhe e lakuar :

– sot jam frut shumë i kërkuar ,

disa njerëz më bënë urim ;

Rrofsh banane , ca gojë mbyll !

Një i bardhë dhe i zi :

– më shijon çdo njeri

kur një femër synë ta mbush ,

i thonë ; më je bërë si rrush .

– dy mijë vjet që jam kafshuar ,

s’jam më fruti i ndaluar .

S’do ilaçe e doktor ?

Konsumo çdo ditë një mollë !

– unë kam hyrë në histori ,

ndaj më shihni me zili ,

bishtin pas të gjitha e mbani ,

mua dardhës më doli nami .

– nga agrumet unë kam vlerë ,

si për dimër dhe për verë

kur një gjë nuk të shijon ,

i shton dy pika limon .

– por si zgjoi i një blete ,

mjaltë lëshoj ndënë vete ,

si për miq e lakuriq ,

ofroj gjethe edhe fiq .

– kini inat sa të doni ,

jam majhoshe , më lakmoni ,

kur një grua është me barrë ,

kumbullë , ka si frut të parë .

– sa për nur e bukuri ,

nuk kam shoqe ndër fruti

në çdo festë nëpër botë ,

një qershi e vënë mbi tortë .

Ca të vogëla ngjyrë të kuqe ,

tundnin vithet gjithë huqe :

– kur si frut s’më ha njeri ,

thanën , e shijonë raki .

Frutat e kanë një qëllim ,

nuk është thjeshtë reklamim ,

si për çdo qënie të gjallë ,

mbijetesa në plan të parë .

Nder u bëj kur ha një frut ,

bëj dy punë me një rrugë :

kur lirohem (zbrazem ) në ugar ,

plehëroj , shpërndaj dhe farë .

Keq më erdhi për një frut ,

as u mburr , as nuk mu lut ,

e kafshova , më ngeci në fyt ,

– më fal tha , unë jam goricë .

Po ti fol moj e uruar ,

ndaj je pemë e rralluar ,

po të ha për mëshirë ,

që të shtohesh në natyrë .

– … s’kam nevojë për mëshirë

o bëm nder , o hesht më mirë !