Rajmonda Qose Shkopi
Prej zverku e tërhoqën dhëmbët
ta burgosnin në kafazin e tyre
atë fjalë,
që luftonte për të dalë
prej gojës së metaltë.
Buzët i plasariti,
i bëri gjak
prej përpëlitjeve,
kur duar e këmbë
përplaste për t’u çliruar.
Rebelja,
që paqe me veten nuk kishte,
kërkonte medoemos
këtë botë ta ujdiste.
Pse veç tingulli i saj
do e çlironte këtë botë?
A mundet një zë i vetëm
t’i dal vendit për Zot?!
