Kasam Shaqirvela:Kur t’i shihni foto e video


Kur t’i shihni foto e video

Kur t’i shihni foto e video

Të mos mallëngjeheni për mua

Po çmalluni me kujtimet e juaja

Veç ruani mos t’ju bien në përrua.

Vetëm thuani se e deshti jetën

Më shumë të tjerët sesa veten

Nuk pati pardon për të ligët

Besoi veçse në të vërtetën.

Në jetë, më shumë dha sesa muar

Dhe la veç një bibliotekë për breza

Andaj dhe mirësia iu hakmuar

Sepse e pastroi nga lakadredha.

Edhe pse s’do të jem aty mes jush

Shpirti im për së gjalli nuk njohi pleqëri

Ndonëse trupi tashmë si hiri në prush

Shpirti im mbetet peng i paepur në gjithësi.

Dhe sa herë që do të më kujtoni

Ai vjen dhe juve ju viziton…

Shpresoj se nuk do të më harroni

As shpirti im jo nuk ju harron!

 Kasam Shaqirvela

About Post Author