Kristo Çipa-Sofia-vetull stuhia


KRISTO ÇIPA

Në këngët e bregut si ajo e Marikës, Katinës, Dafinës, Lenit, Vitos etj gjen tipe dhe karaktere të skalitura artistikisht në lirikën bregase himarjote. Këtë aradhë këngësh lirike e shtojmë me këngën pilurjote

SOFIA. VETULL STUHIA

Mos më shko si shën Mëria
Kur ka hënën dashuria
Me syrin që shkrep shkëndia
Se merr flakë dashuria
Sofia vetull stuhia
Ç’ke moj ç’ke?
Dëshpëron zjarret e mia

Në shteg të verbër më dole
Këmbëlehtë si flokë bore
Si hëna yllin më lodhe
Netët fshehe, ditët vodhe
Sofia vetull kalore
Pse moj pse?
Pse fjalën ma rrotullove

Pse tundesh si marrëzia
Si lumi nga xhelozia
Kur vetëtin djalëria
Dhe malet lëviz për tya
Sofia vetull stuhia
Ç’ke moj ç’ke?
Dëshpëron zjarret e mia

Moj era trëndafilore
Si uji në hënë më dole
Kur me gërshet më qëllove
Guximin në det ma hodhe
Sofia vetullkalore
Pse moj pse?
Pse fjalën ma rrotullove

Bregu im , jo s’ka si tya
Seç të hypën bukuria
Kur mbi valë çfaqet Sofia
Lidhet në ishuj stuhia
Sofi e bregut të bukur
Të do shpirti një të puthur 

About Post Author