Kristo Çipa
Në vitin 2015 u formatua Asambli folklorik”Bejkë e bardhë” si një domosdoshmëri për vazhdimësinë e këngës së Pilurit dhe për të rikthyer në zemrat e pilurjotëve gëzimin dhe krenarinë e ligjshme
Dy këngëtaret e para të këtij Asambli ishin dy kushërirat e para Zaharrulla Koka( Kongjini) dhe Valentina Gërdhuqi ( Muço)
Një ndër këngët e Valentinës në vitin 2016 në festivalin e isopolifonisë në Vlorë ku morrëm çmimin e karierës ishte
MERAKU I VAJZËRISË
Dhe një herë sikur të shkoja
Ah të shkoja dhe një herë
Në ato vënde që doja
Ku më piu shpirti verë
Ku zuri të gudulisë
Meraku i vajzërisë
Dhe një herë t’i shikoja
Ata sy që më qëllonin
Atje shpirtin t’a qetsoja
Pastaj le të më verbonin
Se kisha njohur mëkatin
Me pëllëmbë qëllova fatin
Si shkon vallja mendje lehtë
Dhe i ri erës mbi supe
Ashtu zemra fletë- fletë
Fjalët e buzës i puthte
Syri i tij seç më goditi
Ndaj në dimër u fut shpirti
Diçka tha e dot s’i fola
Zemër memecja se kthehu
Unë me vete u lëndova
Ndaj furtuna më rrëmbeu
Zemra ha veten e saja
Jeta gur që shket në pllaja
Mos pyesni në jam vrarë
E plagosur kam një jetë
Deti brenda më ka marrë
Përkarshi rinë shkëmbenjtë
Dallgë e valë dot s’u bëra
Jam e thërmuar si rëra
Ju vite që shkoni e vini
As me hap e as me erë
Ju lutem një herë më shpini
Ku më morri shpirti erë
Një moment syri në shkrepje
Sa njëmijë vite jete
About Post Author
