Lumni Nimani:Shpirt lirie


Lumni Nimani

Shpirt lirie

Kosovë trime ti kjofsh bekue
Njëqind vjet n’luftë me krajli
As diell as hanë nuk t’pat rrezue
Qëkurse t’ndanë prej Nans Shqypni.

Ta ndanë Drinin prej burimit
Ta ndanë motrën e vëllain me vëlla
Ta mohuan gjuhën e Naimit
E njatë Flamur që ma t’mirë s’ka…

T’i mbushen burgjet dhe kazamatet
Plot me djem dhe vasha t’reja
Ai shpirt lirie s’prehet; s’vrahet
As me pranga; dhe as n’beteja.

Por bijtë e tu trima si zana
Armët ngjeshën dhe t’dolën zot
N’djep t’lavdisë i lindi nana
T’bekoftë Zoti përjetë e mot!

Në lule të ballit kush e goditi
Atë bishë mizore njatë shkja t’zi
Trim mbi trima Zahir Pajaziti
Sa një grykë topi pushka e tij.

Rrofsh përjetë o tokë Dardane
Bijë e lashtë e Arbnisë
S’trembe synin nëpër tufane
Krenaria e Nanë Shqypnisë!


About Post Author