LIRIKA 15.11…
LUTJE PASTRUESEVE
Atë stol të vetmuar në hyrje të parkut,
Lëreni pa fshirë,
Se gjethet,
Si tufa e guhakëve nën lisat me lënde,
Do të tremben,
Do çmenden.
Lëreni pra, të flejë stolin e vetmuar mbuluar me gjethe,
Të shikojë ëndrra dashurie.
15.11.2023
PRITJE SHEGE
Ti nuk ke parë pritje shege në nëntor,
Para portës së shtëpisë, pritje shege nuk parë,
Ca kokrra i ka mbajtur mes shirave me zor,
Nga malli dhe pritja ca kokrra i ka çarë.
Sapo shkel poshtë saj,të lumtur mblidhen zogjtë,
Mbi supe dhe mbi flokë mbulojnë te verdhat fletë.
Malli pëlcet dhe gurët e shkëmbit më të fortë,
Kështu më ndodh në vjeshtë kur shega mbi portw pret.
2016
MUND
Ti mund të më vësh taksë te riska e bukës,
Te gualli i qepës ngjyer me kripë,
Te këmisha e hollë e hudhrës,
Te guaska e vezës veshur me një cipë.
Ti mund të ma lodhësh varfërinë,
Për dheun e zi mund të më bësh edhe gur,
Taksë s’më vë dot për dashurinë,
Një zambak do të shpërthejë shkëmbit,si dikur.
2019
Ti kërkon më kot skenë dhe spektatorë,
Në labirinthet e Dedalit luan dramën jeta jote.
Po ta them sot e gjithmonë:
Me qira e kanë dhënë veten fytyrat,
Sot maskat janë pushteti i kësaj bote.
2015
MË THUA…
Më thua të të pëërkëdhel,të puth,të thith të tërën,
Më thua të ta shuaj zjarrin që të djeg.
Bëhem vjeshta e artë per gjethet e trupit tënd
Ku fryjnë erërat e thella që rrëzojnë çdo fletë.
Në detin më të thellë i futemi lundrimit magjisjellës,
Bëhemi korale e vetplotësojmë mrekullinë,
Në sytë e tu pikturoj perëndime të një dielli tjetër
Që ende nuk ka lindur për qiellësinë.
Pastaj, më i etur se dhe vetë etja,
Filloj t’i ripi me fund kupëzat e syve të tu.
Në qiej te pazbuluar rënkon tretja
Për të pikuar bardhësisht s’di se ku.
2011
