Të zgjodha ty
Të zgjodha ty pa u menduar,
kur zemra fshiu llogjikën time,
kur sytë e tu që kur i ndesha,
më linin zgjuar deri në agime.
Të zgjodha ty kur dhe të tjerë,
peng e kërkonin këtë zemër,
ndoshta u linda vetëm për ty,
ndoshta prandaj u linda.. femër.
Do të të zgjidhja edhe sikur,
sytë e mi mos të shikonin,
puthjen time edhe pse larg,
buzët e tua do ta shijonin.
Do të të zgjidhja ëngjëlli im,
nëse dhe një ditë në tokë qëndroje,
zemrën do nxirrja nga kraharori,
krahë që ta bëje të fluturoje.
About Post Author
