Mimoza Çobo·E DASHURUAR ME JETËN


Mimoza Çobo· 

E DASHURUAR ME JETËN

Në shtegun e errët midis jetës dhe vdekjes ,
përroi i jetës shter rrjedhën në çast ,
kur vdekja thith me buzën e etjes ,
çdo rremb të fshehur ,që pikon pjalm .

Nuk di kur do t’i shkel sinorët e shtegut ,
prej të cilit nuk ka më kthim ,
por di se kam forcën e drurit të shelgut ,
të hedh rrënjë burimeve në vrullim :

Të mbështes kokën në djepin e Tokës ,
siç e mbështeta në barkun e nënës ,
kur Zoti më mbronte brenda mikrobotës ,
që ka krijuar në mitrën e femrës .

Pastaj, mbi gjethet e vjeshtës më la zog të lirë ,
të mbushja stinët me cicërima jete ,
thuprat e erës, t’i bëja lastarë në gjethim,
t’u jepja frymë, deri në inde e deje .

Por s’di , kush m’i mbylli udhët me driza ,
rrezet e agimeve mbuloi me mjegull !
Kush gjakosi krahët e ëndrrave me shtiza ,
kush m’i trembi engjëjt nën vetull ?…

Pash disa hije ,më të zeza se nata ,
në trungun e kohës më kryqëzuan ,
mes shtypjes së egër, grahmë urie pata ,
të rritja filiza nën diell të cunguar .

Me palcën jetësore , mbledhur në eshtra ,
ushqeva katër shqiponjat e qiellit tim ,
t’mos kishin uri sofrës,ku servirej gënjeshtra ,
dhe zinxhir i skllavërisë trokëllinte me oshëtim .

Nën këtë qiell murosur me rrufe egërshane ,
skifterët ushqehen me shpirtra të plagosur,
syrit tim u futën tinëz , ca re hirtoshe vejane ,
dëbuan zogjtë e mi, botës së pasosur .

Duke i detyruar të arratisen nëpër kontinente ,
si shtërgu ngarkuar me mall e derte ,
kurse mua sytë m’i çukitin cicërimat e vetme ,
që vijnë nga hapësirat e përtej deteve .

Nën këtë qiell , ku tërbimi njerëzor s’njeh limit
dhe jeta qëndron varur mbi një fije reje ,
ka një kohë për të shkrirë akujt në shpirt ,
që zemrat të rrahin me tinguj hareje .

Nuk di kur do t’i shkel sinorët e shtegut ,
prej të cilit nuk ka më kthim ,
por,ndiej se jetën kam dashuruar pareshtur ,
në lakun e saj ,ku ka rënë shpirti im .

Prandaj , kur demonët të rendin tërbuar
dhe dheun të gërryejnë me thundra ,
ti , Tokë vishmë me membranat e tua ,
dhe nën qiparis me jetën,do jem e dashuruar .

Shkëputur nga vëllimi me poezi ” Universi femëror “

About Post Author