Mimozat e portretit tim-Mimoza Maria Ajdhoni


Mimoza Maria Ajdhoni

Qetësi marramendëse në dhomën time,
një mesnatë nga të tjerat disi ndryshe.
Sytë e mi humbur te korniza përballë.
Pse m’u duk befas se aty ishe?

Shkund veten e tëra dhe të pyes:
– Eshtë vonë, nuk ke fjetur akoma?
Përgjigje kërkoj në sytë e tu.
Si t’i mposht ndryshe orët e vona?

Jo, aty s’mund të ishe ti. U marrosa?
Aty ku portreti im ishte dikur,
ti vetë e zgjodhe fotografinë time,
me ngjyrë të verdhë kishe lyer atë mur.

Ty mimoza të pëlqente të pikturoje,
me ato e rrethove portretin.
Dikur qeshja me shpirt kur me thoshje:
– Do doja me të verdhë ta pikturoja detin.

( Shkëputur nga libri im ” Labirint “, poezi. SH.B.MUZGU, Tirane, 2023)