– Kushtuar poetit Ndoc Gjetja
Po të kërkoj o Poet, ditën që ke lindur
Si një urim zemre për Ty, si një blatë e bekuar
Se vdekja jote ka kohë që ka humbur në qiell
Vetë perëndia e ka mohuar.
Po të kërkoj o Poet, këtu me disa poetë të tjerë
Para portretit tënd mjekërrthinjur me respekt u ndalëm
Tē morëm përqafim në krahë vargjesh frymëzimi
U betuam edhe njëherë për Dhjatën.
Me qytetin u zgjuam, me vargjet e tua në gojë
I shpërndamë kudo si polen temjani
Që lulet të çelin si metafora dashurie
Qytetit buzë Drinit, në çdo dritare.
Po të kërkoj o Poet siç kërkon bujku farën
Arë e poezisë kurrë të mos mbetet djerrë
Se Ti je idhull frymëzimi, Ti na e sjell vlagën
Plug i artë në zemër përherë.
Po të kërkoj o Poet, Biri i Njeriut
Qyteti ta dha emrin apo Ti ia fale atij
Por e di se do të kalojnë shumë e shumë vjet
Do të jetosh si gur themeli me poezi.
