Poezi:Zoica Gjolla Popi

Poezi

Shi në shpirt

Ma lagu shiu shpirtin

me lotin mbetur i patharë

i kripur,

rubin

i shëndritshëm,

i lëngëzuar,

i shkrirë në ngrirjen e vështrimit,

në retinën blu

blu si qielli

mbi detin blu.

Eh…. ku vete ku?

në rrëkezën e lotit u përthafsh!

Ndalu!

mos rrëshkit faqeve!

Merre dhimbjen e çjerrë

me tundimin e mjerë

si vështrimi ngulitur

në kreshpëmalin

me mjegullnajën para shpërthimit

e fryrë

gri e errët

e dendësuar….

Rëndohu,

por të lutem mos u shtrydh

sepse…. sepse

në mes shiut ka dhe diell

për të më ngrohur shpirtin.