Fëmijës që lind pafajësisht
ia lidhin një nyje në qafë
e paisin me një çertifikatë
në një zyrë të gjendjes civile
si shtetasin e radhës në rreshtim.
Por ka edhe njē regjistër tjetër të fshehtë, me ngjyrë
që fle diku në një zyrë partie
që e bën anëtar të fjetur
që ia pret rrobën, kostumin pas vetes
që ia bën gati vulën, siglën, flamurin.
Dhe kur ai të rritet sakaq
ia bëjnë edhe një vaksinë politike
që të ketë imunitet ndaj kundërshtarit
që ka lindur
në të njëjtën një kohë me të
në të njëjtën kohë politikomanie.
Përballë në të njëjtën skakierë
ku fitorja duhet luajtur me çdo kusht dhe çmim.
E bëjnë të aftë, ushtar
të bërtasë, të shajë edhe perëndinë
këdo që tenton të godasë
nderin e partisë, flamurin e saj.
Dhe ky është tribuni i ri
që magjeps të tjerët
me llomotitje premtimesh në ajër
kandidati i nesërm për post të lartë
duke mbushur thasë me vota partie
duke u pajisur me merita të larta
për shërbime që i duhen vetëm një fitoreje.
Për idhuj e flamuj të sajuar enkas
për luftën në një llogore.
Fëmijën që lind pafajësisht
e pagëzojnë me gjak partie
për një fushatë që ka filluar që me lindjen e tij
dhe frymëzimi i tij do të jetë i sigurt
në ndeshje gladiatorësh për një fitore
vetëm në një anë, për një palë.
Flamuj të përdhosun nga kundërshtarët
atë do ta dehin
si coha e kuqe demin.
Dhe toreadori fërkon duart
për fitoren e radhës.
Vetëm qëllimi, mbi gjithçka qëllimi
duke shkelur mbi nder, moral dhe cilësi të larta
Vetëm pushteti i tyre të lulëzojë
zullumi, paraja, pasuria të trashet bindshëm.
Deri sa të rrokulliset dhe t’i vërë poshtë
dhe paç t’ua zërë frymën…
