Sa Fisnikë qëndroni në Fronin
e zemrës sime, o të urtët e mi!
U prehshit në paqen e Zotit!
NËNA IME
Nëpër kopshte yjesh vargjet t’i mblodha,
një bust mes tyre je ti, e shtrenjta ime,
fronin me kurorë për ty unë e zgjodha,
si pika e vesës e ndritur në agime.
Në dorën time, e vogla dor’ e zbardhur,
në syt’ e mi, rrudhat fytyrës lënë,
në zemrën time, gjaku yt pandalur,
në jetën time, madhështia jote, nënë!
E gjithë qenia jote është thesari im,
i pari mall i jetës i ndezur zjarr,
e trëndafilta puthje, e para kundërmim,
e para fjalë e buzës, e fundit që do marr.
@seti pezaku vladi
LULE TË BARDHA
Në flokun tënd të zi
çelën lule të bardha
e binin nëpër dhembje vitesh,
nënokja ime!
Ah, ato lule,
ruajtur në kornizën e syrit tim!
Pranverave kur çelin
më kthejnë tek floku yt,
nëpër ato petale
i trishtë mendimi shkon
tek ajo ditë kur
shpirti yt fisnik
dalëngadalë
fluturoi nga duart e mia
larë me gurrën e lotit;
si pëllumb u ngjit në qiell
nëpër re të bardha,
në kopshtin e yjeve!
@seti pezaku vladi
———☆☆☆
BABAIT
Me shkulme ngjyrash hyri sot prilli,
Siluetën fisnike të babait më vizatoi,
Dhembjen kujë, kristal plasaritur,
Psherëtima e shpirtit stuhi e mbuloi.
S’e mbajta dot amanetin e muzgut,
Përroi i lotit rendi drejt selvisë,
Dridhet buza mbi mermerin vesëlarë,
Mbi mallin e gjumnajës përjetësisë.
@seti pezaku vladi
MALL
Aah Baba!
Mall i ndezur
që sfilit në heshtje,
dhembje e pashuar që gërvisht!
Ky mister paskaj në jetën e njeriut
mbeti enigmë e pazgjidhur nga dituritë,
dimensioni i vetëm i kuptimit të jetës.
Mizore do të ishte
të jetuarit pa këtë zinxhir lidhje
nga i gjalli tek i vdekuri!
Kjo lidhje e pazgjidhshme
më thërret të vij drejt qiparisave
galvanizuar me dritë argjendi
ku vajtojnë kumritë.
Ngjitet malli trëndafilave të verdhë
mbjell nga ti Baba, në oborrin e shtëpisë.
Në të verdhë janë ngjyer edhe hijet e tyre,
erëmimi shpërndahet
me tingujt e muzikës tënde
shpirtit të qytetit!
Çdo gjurmë e jotja,
o engjëlli im,
më sjell të gdhendur portretin tënd fisnik
me gonxhen e verdhë
vendosur në xhepin e vogël të xhaketës.
@seti pezaku vladi
———☆☆☆
Poezi-TANKA
(Nga libri “BLIC” me poezi-tanka).
☆☆☆
* Mbrëmë më erdhi
Nëna e babai.
Pluskonin në sytë e mi;
Pasthirrma e mallit tim,
Prap më la në vetmi.
☆☆☆
* Kur vij tek ti baba
Me krah’ ere fluturoj,
Sikur ngrihesh, portën hap…
Kthehem rënduar
Me dhembje pashuar.
☆☆☆
* Rinuat
Kur rinìa nuķ rinonte,
U plakët
Kur plakja vononte.
Dy nyje lidh në zemër!
☆☆☆
@Seti Pezaku Vladi
