I tretur në mendime shikoj andej rrugës
a do të vish një ditë e buzëqeshur…!?
me fluturimin e lehtë të fluturës
mes polenit nëpër lule reshur…
E di se një ditë do të të marrë malli
për pemët në rrugën e vjetër…!
do jesh andej ku puqen qielli e mali
aty do të gjesh edhe një copë letër.
Kur të lexosh atë letër të zhubrosur
pika loti do të rrjedhin faqeve të tua
jetuam të dy me zemër të plagosur
e tani do më kuptosh më mirë mua.
Ti do të kthehesh një ditë e mërzitur
pse të kish mbuluar hija e kujtimit
kujtim që si zjarr mua më ka zhuritur
sa tani prej tyre ka mbetë hiri e tymi.
