Vetëm ëndrra
U hodha dhe sot nga gjumi përpjetë,
nga një ëndërr me djersë mbuluar,
përreth shoh me sytë gjysmë të mbyllur,
Asnjë rreze dielli nuk duket,
vetëm pika shiu si lotë,
që aviten pranë meje gjithë mllef,
sende të njohura kërkoj, por më kot.
Vetëm ëndrra është aty,
herë duke u dredhur, herë e qetësuar,
asgjë nuk ngjan si më parë,
në hapësirën që duket e zvogëluar.
Veshët e mi disa këngë zogjsh,
kapur pas degëve të thata dëgjojnë,
si sytë e mi larguar nga buzëqeshja,
kur disa pjesë nga kuptimi i jetës më mungojnë.
( Shkëputur nga libri “Labirint”, poezi, SH.B. MUZGU, 2023)
