fabul
Për mushkën xanxare
Të qëllon me shkelma
Dhe të ha me dhëmbë
Çfarë nuk thonë tjetër,
Se e meriton
Dhe fare ta vrasësh,
Zakonin s’e harron
Diçka tjetër thonë
Për pelën punëtore,
Se me kaun ka patur
Një lidhje jashtëmartesore …
Kështu vjen nga e thëna,
Fjala bie fjalë,
Më mirë të të dalë syri,
Se nami të të dalë …
Këto vargje duken
Pak të ngatërruar,
Dikujt kohë i duhet
Dhe për t’i kuptuar
Si mushka dhe pela
Dhe delja me dhinë,
Shumë kohë më parë
E kanë historinë
Mushka plot me huqe,
Pela përgojuar me kanë,
Delja bishtin poshtë,
Dhija lart e mban …
E, që thoni ju,
Muhabetit t’i vëmë kokë,
Kështu janë ca tipa
Në këtë dreq botë
Vetë i ka mbytur llumi,
Se nga llumi vijnë,
Gjithë jetën e tjetrit
Kërkojnë ta nxijnë …
