Ekuacion i pazgjidhur
Sa e shtrenjtë je bërë,
o jetë,
na hedh sa andej-këndej,
na degdis udhë pa udhë,
krenaria hedhur tej.
Sa e vështirë ditë pas dite,
ekuacion i pazgjidhur,
halle-halle kjo dynja,
kuletëbosh e duarlidhur.
Sa pafat na bën, o jetë,
dhe pse e kërkojmë me ngulm,
herë na hedh borë të butë,
herë orteqet i hedh shkulm.
Sa na dëshpëron, o jetë,
herë me dashje, herë padashje,
sa të pakta ditët paqësore,
veç mashtrime,zënka,vrasje.
Por e vetme je, o jetë,
se nuk kemi një të dytë,
përkëdhelna sadopak,
të na qeshë zemra e sytë.
Ekuacion i vështirë,
nuk ia dimë të gjithë zgjidhjen,
sadopak na mbaj me hatër,
ndonjëherë përdore hilen.
