Nga Caush Kullafi
Në një vlerësim në rang republike, ku performanca e bashkive matet përmes rezultateve dhe përmbushjes së detyrave, Bashkia Kamëz renditet në vendin e parë, me 100 pikë nga 100. Pas saj renditen Bashkia Tiranë me 99,4 pikë, Himara me 90,9 pikë dhe Durrësi me 87,2 pikë. Ky rezultat, përtej shifrave, është një tregues i qartë i një modeli drejtimi që meriton të vlerësohet.
Në krye të këtij institucioni qëndron kryetari Rakip Suli, i cili gjatë drejtimit të Bashkisë Kamëz ka vendosur theksin te organizimi, menaxhimi dhe ndjekja e punëve në terren. Një bashki e madhe dhe me nevoja të shumta kërkon jo vetëm ide, por mbi të gjitha aftësi organizuese, administrim të kujdesshëm dhe këmbëngulje për t’i çuar projektet deri në fund.
Një drejtues mund të premtojë , por ai është i mirë sa arrin të realizojë. Dhe pikërisht këtu qëndron rëndësia e këtij vlerësimi. 100 pikët e Kamzës janë një rezultat që e vendos punën e administratës dhe mënyrën e drejtimit të saj në një pozicion të veçantë në rang kombëtar.
Nga menaxhimi te transformimi i qytetit
Aftësia menaxheriale e një kryetari bashkie shihet më së miri në mënyrën se si ai i kthen problemet në projekte dhe hapësirat e lëna pas dore në mundësi zhvillimi. Në këtë drejtim, Kamza ka njohur ndryshime të rëndësishme në hapësirat publike, infrastrukturë, shërbime dhe mjedis.
Një prej shembujve që tërheq vëmendjen është Liqeni i Paskuqanit. Një hapësirë me potencial të jashtëzakonshëm natyror dhe rekreativ po merr gjithnjë e më shumë vëmendje, duke u konceptuar si një pasuri për qytetin dhe për banorët e tij. Transformimi dhe promovimi i kësaj zone e bëjnë liqenin një nga pikat që mund t’i japë Kamzës një identitet të ri urban, natyror dhe turistik.
Ky liqen është një mundësi për të krijuar një hapësirë ku qytetari pushon, familja shëtit dhe qyteti merr frymë. Pikërisht projekte të tilla tregojnë se menaxhimi bashkiak nuk duhet të kufizohet vetëm te zgjidhja e problemeve të ditës, por duhet të shikojë edhe përpara.
Një model drejtimi që meriton vëmendje
Rakip Suli mund të cilësohet sot si një nga drejtuesit vendorë që e ka vendosur organizimin dhe menaxhimin e punëve në qendër të modelit të tij të drejtimit. Puna në një bashki nuk është e lehtë. Ajo kërkon koordinim të shumë strukturave, administrim të burimeve, komunikim me komunitetin dhe mbi të gjitha aftësi për të vendosur prioritete.
Prandaj, një renditje e tillë duhet lexuar si një vlerësim i punës së bërë dhe i mënyrës se si është administruar institucioni.
Kamza sot është një bashki që synon të ndërtojë një identitet të ri. Dhe kur një bashki arrin të renditet e para në performancë në nivel kombëtar, kjo është një arsye për të folur për vizion, organizim, përgjegjshmëri dhe aftësi menaxheriale.
Në fund të fundit, qytetarët nuk kanë nevojë vetëm për fjalë. Ata duan të shohin ndryshimin në rrugën ku kalojnë, në lagjen ku jetojnë, në hapësirat ku pushojnë dhe në shërbimet që marrin çdo ditë.
100 pikët e Kamzës janë, mbi të gjitha, një mesazh: kur drejtimi shoqërohet me organizim, menaxhim dhe vizion, rezultatet bëhen të dukshme dhe flasin vetë.
