Ruzhdi Gole
MES REKËS DHE BRIGJEVE
*
Ne jetojmë tek liria e tjetrit
grabitur qysh herët
nga Liria jonë …
*
Gjeografia e syve përhapet gjithandej
plot ujëra të shëndetshëm, të turbullt,
male të vërtetë, ndonjëherë
mëndjemëdhenj
plugje luginash
rrudhur.
Ujërat pëshpërisin, pastaj vrapthi
pa bujë rrjedhin ndër gishtat
e zajeve rreze – heje,
Kreshta
shkund dimrin
në Rekë
dimri s’ka gjunjë
ngryset ndonjë shpelle.
*
Më shumë se drobitje
më pak se rrëmujë
i gjithi vallëgimë,
mënjanë prerje. rri dimri
lutje
Lutem
Reka të mos hyj
në dimërimin jetim …
*
Lumi ndjek gjahun mespërmes pyjeve…
Thëllimet nuk dorëzohen njësoj
terri shtrin krahun, nata kreh
flokët, duket
e përkryer.
Papritmas rrëshqas përmbys mbi hon
Reka zgjat duart, më pret pa plagime
pastaj ulet gjithandej
Zonjë…
*
Zhirovnicë, s’më zë dhe këmba …
Asnjë hap nuk më ngjiz
më merr lumi
lum gjëma…
Pa të parë kund, askund,
era më rrëmben plot gjemba
m’i vret gjunjtë çdo shtëllungë.
Zhirovnicë, s’më zë dhe këmba…
*
Në Mavrovë çohem fillikat,
i hollë si një fjollë,
ëndërr zënë
në çark.
Nuk m’i zë veshët bora
nuk m’i mbyt këmbët
një gjol,
Plasa-plasa me mëngë të holla
çdo mëngjes zgjoj
Mavrovë…
*
Mbush ujë tek gurrat në Rostushë,
gushti nga vapa përton të luaj
aventurash,
Pylli asnjë nuk nderon me grusht.
*
Mes Rekës dhe jugut
mes jugut dhe
Durrësit
lexoj tekstet e ungjillta
të kreshtës dhe mugut
të brigjeve pa asnjë
testament gjumi.
*
Shpërndarë gjithandej të tjera ngjarje…
Vela veshëprerë, torbat hamenj
era s’i mban dot frerët
e shpalljeve.
Shpalljet … të hershme
të vërteta, dinake,
Ç’të rrëfejë Durrësi për vjedhjet
qysh në shpërgenj,
ç’të rrefejë
pylli rekas
për vrasjet
e kunadheve?
*
Flaka mbillet përdhe…
Secili tjetrin
përgjysmë
e sheh.
Të tjerët bien gjak.
Suferina
nga Dyrrahu
gjithë re
na sheh
pak rri këtu, ikën
pendohet tek Durrësi plagë.
*
Përkrah Reke
qëllon të jem
plot valë detesh.
Në Mavrorë, në Rostushë..
Durrësi është plot male
puthur buzë – buzë…
