DOLI NGA SHTYPI MONOGRAFIA “FSHATI MAZGIT PËRGJATË KOHËRAVE TË HISTORISË”, II, SHB “LENA”, Prishtinë, 2026
FJALA REDAKSIONALE
Nga redaktori: Zymer Mehani
Me përulësi dhe ndjenjë përgjegjësie, para jush paraqesim vëllimin e dytë të monografisë “Fshati Mazgit përgjatë kohërave të historisë”, i cili kësaj radhe fokusohet në një fushë me rëndësi të veçantë: gjenealogjitë familjare. Ky ribotim është fryt i një pune këmbëngulëse dhe përkushtuese të autorit Fadil H. Curri, i cili për vite me radhë ka ndjekur me vëmendje e dashuri të madhe historinë, rrënjët dhe zhvillimin shoqëror të fshatit Mazgit.
Autori Curri ka përmbledhur me shumë kujdes rrëfime dhe dëshmi nga familjet e fshatit, duke dokumentuar me zell kontributin e tyre ndër breza — qoftë në kohë lufte apo paqeje, në sfidat e jetës së përditshme, në emigrim, apo në përpjekjet për arsim e punësim. Ky vëllim është dëshmi e gjallë se historia nuk është vetëm ajo që shkruhet në libra të mëdhenj, por edhe ajo që ruhet me dashuri në gojën e pleqve, në arkivat familjare dhe në kujtimet kolektive që shpesh mbeten të paartikuluara.
Në këtë monografi, autori Fadil H. Curri ka sjellë me ndershmëri dhe përkushtim personal portrete të familjeve që kanë ndërtuar, mbrojtur dhe ruajtur Mazgitin. Duke shkelur pragjet e shumë shtëpive, duke zhvilluar intervista e duke ruajtur çdo fjalë me kujdes arkivor, ai ka ndërtuar një mozaik të çmuar të rrënjëve tona.
Padyshim, procesi nuk ka qenë i lehtë. Shumë familje ishin jashtë vendit, të tjera nuk mundën të sjellin gjenealogjitë në kohë, dhe disa për arsye të ndryshme nuk iu përgjigjën ftesës për bashkëpunim. Megjithatë, Fadili, me këmbënguljen e tij karakteristike, arriti të përfshijë një pjesë të konsiderueshme të familjeve të Mazgitit, duke hedhur themelet për një vëllim të tretë, edhe më të plotë e gjithëpërfshirës.
Ky libër nuk është vetëm një përmbledhje emrash dhe datash, por një thirrje e sinqertë për vetëdijësim, për ruajtjen e identitetit dhe për respektimin e historisë sonë të përbashkët. Ai u drejtohet sidomos brezave të rinj që të çmojnë rrënjët e tyre, të nderojnë sakrificat e të parëve dhe të kuptojnë rëndësinë e ruajtjes së trashëgimisë familjare dhe kombëtare.
Në emër të redaksisë, i shpreh mirënjohje të thellë autorit Fadil H. Curri, për përkushtimin, kohën dhe pasionin që ka derdhur në këtë projekt, i cili mbetet vepër e vlefshme dokumentare për fshatin Mazgit dhe një burim i çmuar për studiuesit e së ardhmes.
P.S. Libri është ribotim i ripunuar.
________________________________________
Zymer Mehani
Redaktor i monografisë
Fshati Mazgit përgjatë historisë, II (Gjenealogjitë familjare), ribotim i ripunuar,
Podujevë, Qershor
