LAMTUMIRË, XHEVAHIR!
Sot, më 12 gusht 2026, përcillet për në banesën e fundit Nënkolonel Xhevahir Abdija, një ushtarak që i kushtoi 27 vite të jetës së tij uniformës, Forcave të Armatosura dhe shërbimit ndaj atdheut.
Xhevahir Abdija lindi më 30 nëntor 1962, në Sohodoll të Dibrës. Rrugëtimin ushtarak e nisi që në moshë të re si “Skënderbegas”, në Shkollën e Mesme Ushtarake “Skënderbej”. Më pas vijoi studimet në Shkollën e Bashkuar të Oficerëve, në specialitetin Këmbësori, të cilën e përfundoi me rezultate të larta. Formimin e tij ushtarak e plotësoi më tej në Akademinë Ushtarake, si dhe përmes kualifikimeve e specializimeve të tjera profesionale, të cilat i shërbyen ecurisë së tij në karrierën ushtarake dhe ngritjes në gradë e përgjegjësi.
Karrierën e nisi si komandant toge në Shkollën Ushtarake “Skënderbej”. Ishte një fillim që do të përcaktonte gjithë rrugëtimin e tij: nga komandanti i togës, te detyrat pedagogjike dhe institucionet e arsimit ushtarak, duke kaluar më pas në detyra gjithnjë e më të rëndësishme komanduese dhe shtabi.
Në vitet 2003–2005, shërbeu si komandant i Batalionit të Policisë Ushtarake, një detyrë me përgjegjësi të veçantë në strukturat e Forcave të Armatosura, ku kërkoheshin disiplinë, vendimmarrje, integritet dhe aftësi të larta profesionale.
Më tej, karriera e tij vijoi si oficer Shtabi në Drejtorinë e Operacioneve dhe Stërvitjes në Shtabin e Përgjithshëm të Forcave të Armatosura, duke kontribuar me përvojën dhe formimin e tij në një nga fushat më të rëndësishme të veprimtarisë së strukturave ushtarake.
Për punën e mirë, përkushtimin dhe aftësitë profesionale, Xhevahir Abdija u vlerësua me urdhra dhe medalje për shërbime të veçanta dhe për shërbim karriere.
Por pas gradave, detyrave dhe vlerësimeve qëndronte njeriu: oficeri që e njihte përgjegjësinë e uniformës, pedagogu që përcolli dije te brezat e rinj, komandanti që mbajti përgjegjësi dhe bashkëpunëtori që la kujtime te njerëzit me të cilët punoi.
27 vite nën uniformë nuk janë thjesht vite pune. Janë vite jete, sakrifice, disipline dhe shërbimi.
Sot, kur Xhevahir Abdija përcillet për në banesën e fundit, dhimbja është së pari e familjes së tij, por ajo është edhe e miqve, kolegëve, bashkëpunëtorëve dhe e gjithë atyre që e njohën dhe shërbyen me të.
Për ndarjen e tij nga jeta, familjes së të ndjerit i ka përcjellë telegram ngushëllimi edhe Shefi i Shtabit të Përgjithshëm të Forcave të Armatosura, Gjeneral Lejtnant Arben Kingji, duke shprehur respektin dhe vlerësimin për kontributin e tij në shërbim të Forcave të Armatosura.
Sot mbyllet rrugëtimi tokësor i një oficeri, por nuk mbyllet kujtimi për të.
Nga Sohodolli i Dibrës, vendi ku nisi jeta e tij, deri në strukturat më të larta ku shërbeu, Xhevahir Abdija la pas një jetë të lidhur me uniformën, detyrën dhe atdheun.
Lamtumirë, Nënkolonel Xhevahir Abdija!
Uniforma jote do të mbetet një kujtim i shërbimit tënd.
Emri yt do të mbetet në kujtesën e atyre që të njohën.
Vepra jote do të jetojë në kujtimet e familjes, kolegëve dhe bashkëpunëtorëve.
U prehsh në paqe!
Kujtimi yt qoftë i përjetshëm!
