Mbesës sime Jolene A. Habazaj, që sot mbush 1 vjeçe
Albert HABAZAJ
Ditëlindjet janë gëzime
Gëzimet na mbushin zemrën,
Sa gëzon kjo zemra ime
Me gjysh Halon po nis këngën.
Ka ardhur nga Italia
Jolene, mbeskëza ime,
Është mjaltë nga ëmbëlsia
E vogla, sa një thërrime…
Ditëlindjen për të festuar
Vjen në Vlorë, sikur na njeh,
Loz me këmbë e loz me duar
Qesh si diell, kur na sheh.
Edhe flet ca fjalë të ëmbla
Që i kupton veç ajo,
Ka ca tinguj, dritë me ëndrra
Kanarine domosdo…
Dy bishtaleca drenushe
Dy trëndafila kurorës,
Vjen thëllëzë e bukur fushe
Jolene e Lelit dhe Lonës.
1 vjeçe i mbushi sot
Si buzëqeshje trëndafili,
Bën të ngrihet, s’mbahet dot…
E njomë si gonxhe prilli.
Gugat kur i flas në emër
Dhe kthen kokën ëmbëlsira,
E kanë shpirt, e kanë zemër
Kushërinjtë e kushërirat.
Bën të flasë, sikur na thotë:
Në Vlorë datëlindjen e parë
Bëj me më të mirët në botë
Gjyshet e gjyshërit kanë ardhë…
Vlorë, 3 Nëntor 2026
