Vajza dhe vjeshta-Lefter Shomo

LEFTER SHOMO

VAJZA DHE VJESHTA

Ja, po zhvishen dhe pemët
Si peizazh pas luftimit
Të topitjes mbajmë veshje
Pelerinën e dimrit.

Poshtë shtruar gjethnajë

Si flokate qilimash

Veshje ngjyrash prej vajze

Bollëkmbushur kaçilat.

Mbi të vashëzës gjirin

Disa gjethe rrënohen

I kujtojnë ato ligjin

Se të lartmit rrëzohen.

Ja një gjethe pëllumb

Kur murlani e rreh

I strehohet në grusht

Një pusullkë i sjell.

Lëviz n’ ajer një gjethe

Që nga mezi i kërcellit

Që nga pamja e veset

Sa i ngjan harabelit.

Valëvitet një gjethe

I rri sipër te bluza

Si dhuratë e vjeshtës

Si një flutur me lulza.

Mban ajo refleksionet

Dhe të stinëve te tjera

Bukurinë ,emocionet

Ku shpërthen lule jeta.

Përreth mbushet natyra
Me nuancat e kohës
Vasha jonë ruan ngjyrat
Shpirtit roze të epokës.