Duet poetik – Ariel Bella & “Fjalë që zgjojnë”
Ariel Bella:Për atë Zot, ka net që të pres ende,
të vish si dritë në fund të errësirës
dhe mallin të ma shuash me frymën tënde.
.
Fjalë që zgjojnë:Për atë Zot, edhe unë zgjohem netëve,
duke kërkuar hijen tënde në heshtje,
si njeri që humbi udhën drejt zemrës së vet.
.
Ariel Bella:Mungesa jote më dhemb thellë,
dhe heshtja bërtet më fort se çdo fjalë
në dhomat ku kujtimet s’flenë.
.
Fjalë që zgjojnë:Edhe tek unë kujtimet ecin zbathur,
prekin muret dhe thërrasin emrin tënd,
aty ku vetmia rri zgjuar deri në agim.
.
Ariel Bella:Për Zotin e madh po të them,
më mungon qetësia që sillje me vete.
Fryma më mbetet pezull,
dhe buzëqeshja tretet ngadalë në mendime.
.
Fjalë që zgjojnë:Për Zotin e madh po të rrëfehem,
as unë s’e gjeta më qetësinë pas teje.
Qeshjet m’u bënë të zbrazëta,
dhe netët më mbetën pa dritë në sy.
.
Ariel Bella:Kërkoj në kujtimet e mia
ata sy që më ndriçonin natën,
prekjen e duarve të tua,
dhe afërsinë që më qetësonte shpirtin.
.
Fjalë që zgjojnë:Ruaj ende në duar ngrohtësinë tënde,
si zjarr që s’di të shuhet me kohë.
Dhe sytë e tu më ndjekin ende
në çdo ëndërr që mundohem ta harroj.
.
Ariel Bella:Zemra ende të mban brenda,
si toka e tharë që pret shiun e parë.
Dhe pse mundohem të të lë larg,
malli yt më gjen përsëri.
.
Fjalë që zgjojnë:Edhe zemra ime s’të nxori kurrë,
ti mbete plagë dhe lutje bashkë.
Sa herë largohem prej kujtimit tënd,
malli yt më kthen prapë tek ti.
.
Ariel Bella:Por ka net që të pres ende me shpresë,
se një ditë do të vish
bashkë me dritën e agimit.
.
Fjalë që zgjojnë:Dhe nëse një agim na bashkon sërish,
do të vij pa fjalë, vetëm me zemër,
sepse disa dashuri nuk dinë të mbarojnë kurrë.
