” NGA AI ZJARRI YT “
—————————————
*
Zemrës sime Eshkë , seç i vure zjarrë
Ku e gjete gurin dhe Masatin vallë ?!
Gurin dhe Masatin , kush ta dha më thuaj
Sa as fryma jote , s’ka derman t’më shuaj !
*
Ku e gjete gurin , kush ta dha Masatin
Po më djeg prej qefit , apo shfryn inatin ,
Nëse prej inatit , shpirti im ç’të bëri ?
Nga ky zjarri yt , po digjem i tëri !
*
Më digj moj të tërin, më ndiz dhe më shumë
Fryi asaj flake , le të bëhem shkrumë,
Shkrum le të bëhem , zbraze atë inat
Hiri të më mbesë , nga i yti mëkatë !
*
Veçse do të lus , atë pakëz hi
Mblidhe me ato duar , e ma fshi në gji ,
Ma fshi në atë gji , mos ta dijë njeri
Në bërthamë të shpirtit , aty në thellësi !
*
Fshihe në atë gji , me sy jepi dritë
Me lotët e tua , vadite për ditë ,
Me ata sytë e tu , dritë jepi ç’do natë
E me frymën tënde , përkëdhelma pakë !
