Gashi Radisheva
Mate kohën krejt si baba e mos rri mrrolun
Me pëllëmbë të dores e mas kohën
dhe e palosi në ditën tjetër që nuk kthehet
krejt si baba.
se pasha Zotin nuk e di,e din veç Zoti,
sa pëllambë kohe në udhë më kan mbetë.
Le inatin le të shkojë me gjethe të vjeshtës
e mos rri mrrolun!
Më ka marrë malli me u gajasë me gojën plot
si atëherë me bukë e krypën mjaltë në sofër
e me loçkë të zemrës bashkë me qeshë.
Hajde bre,
e le ta grimë sikur duhanin
e ta imtojmë në shuplakë të dorës për cigare
si atëherë një gjethe ftoni
e ty e pritë xhezven në gurgullimë
e me dorë në zemër me gacë në mashë
në ballë të oxhakut le ta kallim.
Hajde bre ti tymojmë hallet
e ti përzjejmë në filxhan të kafes
ty e thirrë gjakun në pajtim gjaqesh për së gjalli
krejt vllaznisht ashtu si baba.
Hajde bre,
se në pëllëmbë të fundit
bashkë me pëllëmbën po shkon koha
e sikur gaca që djeg cungun
në oxhak të shpirtit po më djeg malli!
A po vjen,
ta shprushim shpirtin e sikur gacat
të pathënat le ti zdrisim,
e sikur baba krejt me rradhë ne le ti marrim
me sharki a çifteli kangët kreshnike
në ballë të oxhakut të pafikun!
O hajdeni bre,
le ta gjejmë paqën në sofër të paqme
barabar për rreth të ulun
e në ktë jetë ta paqtojmë shpirtin.
Dorë për dore të jem të lidhun përgjatë udhës,
se për askënd se ku ndalet e se kur bie
për të mos u ngritur
e ku rastisë pëllëmbë e fundit nuk i dihet!
