Spiro Kote
BESËPRERJA E MADHE
( baladë)
Ç’sheh ashtu e errur , vetmitare hëna,
Qosheve të nxira, fshehur resh të ngrëna..?!
E mërguar këtë natë, nën duhmë gjakrash,
Besëprerje ndien , prerje thike , qafash…
Kukuvajkë e vonë, pse s’pushon me klithma,
Kur si kalë në këmbë, gjumin , bën heshtja.?!
Kur kamën e të pagjumit, tinëz rrëmben nata:
“Zot na ruaj ,ç’mënxyra, ç’gjëma,vijnë prapa!
Pandemi e krimit, me kurthe gjaksorësh,
Ende që pagdhirë , thur gracka frymorësh,
Pret dritën e diellit, që ta zbardhë me vlim,
Ç’ka shkruan në terr , e vulos në zgjim.
Mëngjesit të fundit , gushtit të tridhjetës,
Vjen, Pari e Zgjedhur, në hipodrom të festës,
Karrocë e ngrirë, fshan , rënkon,prej gurësh,
Si kuaj të mbledhur, në besëprerje cubësh.
Në tavolinë të pokerit, luhen koka-krerësh ,
E pabesë gërshëra, pret ftesa mirësjelljejesh
Këlthet thikëmprehura ,në gjuhë-princërish.
Në passhpina kurthesh, me vrasës fiksimesh
Në këtë gdhirje t’ vonë, me orë përgjumjeje,
Me helm-shigjetash,lyerë , mesazhe tinzare
Me dredhi hafijesh , biseda passhpinësh .
Sajuar protokolle , në duar terxhymenësh.
Të mprehtat kama, mëngjesi fsheh nën dorë,
Kurth’ viktimash thur, nëpër rrjeta leqesh:
Krerë , antikrerë , fatmjerësh , të gjorë :
“Fundi vjen me thika, a n’plumba dyfeqesh”
Pesëqind kryezotë , me grada lartësie,
Pesëqind vezirë, në sërë – otomanie,
Vijnë, pas njeri-tjetrit, në karroca princash,
-kuaj pa kokë- shtrirë, hipodrome pritash.
Të ftuar për ofiqe , shpërblesa t’nishanës,
Pabesia hedh lakun , si grackën e radhës:
Nën pritë përgjaken : Libohovë- Vrionët,
Besëprerja, nderimin,ua shënon te ball-ët ,
Klthmë skifterësh therin, qiell të Manastirit,
Mes-pikut, kur luhen akt- vrasjesh, finale,
Mëngjesi, n’ardhtë, mes news-ve të zgjimit ,
Gjurmëfshirë le të vijë, si gdhirje normale :
“Sergjenëve të nxirë, kripuani kokat !
Të damllosurat t’ nisen drejt Padishahut !
Pashallëqet, çifligjet, luginat dhe tokat,
-Sulltanit – teslim , me bekim të Allahut “
Ç’sheh ashtu e errur , vetmitare hëna,
Qosheve të nxira, fshehur resh, të ngrëna..?!
Mërguar në këtë natë,me duhmë gjakrash,
Besëprerje ndien , prerje thike , qafash…
*****
* Një masakër çnjerëzore më 9 gusht 1830. Në Mansstir u thirrën kinse për festë ,krerët e Toskërisë dhe u vranë pabesisht,në kurth,me batare pushkësh, mbi 500 krerë.
* Terxhymen- (trq) përkthyes, shoqërues
* Teslim- ( trq.) dorëzim
******
