Ku ta gjej
Ku ta gjej një buzë të qeshur,
të më shkrijë akujt e kohës,
si një trëndafil kuq-flakë,
të shndritë në mes dëborës.
Ku ta gjej një buzëqeshje,
të më ngrohë zemër e shpirt,
shpresë për botën e zymtuar,
e për terrin flakë e dritë.
Ku ta ndiej një tingull hareje,
nga buzëqeshjet gazmore,
paqe,prehje të ndiej në shpirt,
pa dilema jetësore.
Ku ta gjej një buzëqeshje ,
më të ëmbël se vetë mjalta,
të ndrijë tokën,të çelë qiellin,
të flasë dita,të qeshë nata.
Ku ta gjej një buzë të qeshur,
e ta zbukurojë njerinë,
si një zanë e mirë legjendash,
të heqë ftohmën,ngurtësinë.
Një buzëqeshje çiltërsie,
të na shtojë të mirat,prore,
jo një maskë hipokrizie,
që gënjen mendje njerëzore.
