NJË MIJË E NJË VJESHTA
Më prit se ika,
si një ëndërr
e fshehur
pas mesnate,
mbi njëmijë
e një
vjeshta
nomade,
ku rri një mall
i thinjur
i ngrënë
dhe qentë kuisin
xhelozë
mbi parmakë
të praruar
hëne…
LUMI I PADUKSHËM
Nëse je ëndërr
që pluskon drejt meje,
imazh a psherëtimë
e një reje,
një lumë i bardhë
do të të dalë përpara,
i dehur me shkëlqim
rrufeje.
Është lumë i lashtë
është lumë i ri
e ndjej kur rrjedh në gji.
Është lumi im i fëminisë
Ka kohë që të pret ty…
DASHURIA E PARË
Më ra
U çvar
dashuria e parë,
si lule mendjelehtë
qershize
që çel në janar…
Vijnë e ikin ditët
mes yjesh fikur,
pa jetë,
një zë i erëmitur
s’e di seç më flet…
PRAPË E PRAPË
…Prapë e prapë toka rrotullohet rreth tokës
Dhe mizat sjellin rropullitë nga fundi i botës…
EPILOG
O botë e mbushur dingas me zhuzhakë!
Me toka kimeriane me fat e pa fat
Sa pak ta njoha dashurinë, sa pak!
Sa shumë fjetëm bashkë në mëkat…
