Shkruan Viron Kona
U sillte lumturi spiunimi,
profesionalizmi i fshehtë,
me talent si merimangat,
futnin viktimën në rrjet!
Çaste kënaqësie kalonin,
kur “viktimën” piketonin,
si hije nate e përndiqnin,
lloj-lloj “faktesh” sajonin.
Pareshtur kurthe ngrinin,
bisedonin vesh më vesh,
viktimën si ta gjurmonin,
si ta futnin atë në “thes!”
S`pranonin dita t`u ikte,
pa spiunuar një viktimë,
po qe se kështu ndodhte,
ajo ditë quhej dështim!
Në ditët që erdhën radhë,
me sukses bashkëpunuan,
kur njëra ditë u doli bosh,
njëri – tjetrin spiunuan!
