Llesh Gjoka
Është diku një grua dhe një rrugë
Është diku një rrugë dhe një grua
Në lagjen B të qytetit T
Rruga ka një shtëpi
Një shtëpi me drita të kuqe
Shtëpia “Hotest girls”
Gruaja ka përpara një tabelë
Një tabelë ndalim shpejtësie
Një tabelë kthesë e rrezikshme
Gruaja vështron drejt rrugës
Tabelat i parakalon
Gruaja e re me mini
Me taka të larta prej ebaniti.
Është diku një grua dhe një rrugë
Është diku një rrugë dhe një grua
Gruaja është e bardhë
Rruga është asfalt i zi
Gruaja nuk është rruga
Rruga nuk është gruaja
Gruaja dhe rruga janë në sinkroní
Nga shtëpia te shtëpia tjetër
Nga e sotmja deri dita nesër.
Është diku një grua dhe një rrugë
Është diku një rrugë dhe një grua
Rruga e josh gruan:
– A do të vish nesër?
Gruaja me qesëndi pranon:
S’kam rrugë tjetër!
Gruaja u mburret të tjerave:
– S’jam nga soji juaj!
Të tjerat me ironi:
– Mos qofshim nga soji yt!
Është diku një grua dhe një rrugë
Është diku një rrugë dhe një grua
Gruaja dhe rruga shkruajnë çdo ditë
Një rrëfenjë të re urbane.
