Ngjitem Qafës së Pazarit që të bëj sehir
pesë mijë lekë qypi i baltës qe biznes i mirë
me pak ujë e ca baltë qypi marshalla
dy qypa për orë bëhen një dynja .
Lëviz mavro Petro ngele fukara
fillo shpejt poçarinë që të bësh para
se me llaç në duar nuk bëhet hair
me zanat të ri do bëhesh më mirë .
Me vrapin e pelës u ktheva në fshat
te hauri i lopës mora një lopat .
– Pse me vrap o bir , po si një lopçar
– S’kam ç’e dua llaçin , do bëhem poçar
-Merre pak më shtruar , prit mos u nxito
se kjo punë e poçit , nuk është dosido .
– Lermë rehat o ba , nuk merr veshë ti
se kjo punë e qypit është me leverdi .
U vara nga lumi që të gjëj llome
baltën kur e gjeta bëra kryq ; për be .
Nga refleksi i dritës dukej porsi ar
s’ish flori e shkreta po balt argjilor .
Me llërët përveshur e brekë nëpër këmbë
hipa sipër baltës , që ta shkel më rëndë
nga ciklat e baltës breka m’u rëndua
s’duroi dot llastika , vajti e u lëshua .
Në mes të llomesë , ngela lakuriq
se per t’u mbuluar s’kish një degë fik .
– S’të tha kot babai , s’është punë për ty
s’mësohet zanati vonë në pleqëri
ik gjëj një dyfek e bëj ndonjë roje
atë ke zanat , me shkollën që doje .
– S’ma ka fajin shkolla , po shumë ndershmëria
me pak politikë , më shifte Perëndia .