(Kushtuar grave dhe vajzave shqiptare
në luftë për liri).
Sot te ju, larg e hedh vështrimin
Gjerdanin ngjeshur me bomba e fishek’,
Një trastë krahut me mallin e pragut
Mbi të brishtin sup të gjatin dyfek.
Përpjetën morët ku shkrepte liria,
Me lisat e rritët hijeshinë e shtatit,
Te trasta e mallit e hidhnit shikimin
Në pragjet e trëndafilta qytetit e fshatit.
Shkelët rrugë e zaje, si malet vargonit,
Ngjitët Dragobinë ku Baca zjarret ndizte,
Gjëmonte Kosova nga Idriz Seferët,
Mashkullores trime Çerçizi lart ju priste.
Bajrak Musineja, Makbulja, Persefoni,
Valë sizmike Margarita Tutulani,
Yje pas yjesh në malet vesh me krisma,
Shotat shqiptare barut e këngë vatani.
Yjet ndrisnin netët, flakët ndiznin strallin
Në tymnaja plumbash shqipja para printe,
Eh, ju vajzat tona, buste sheshmejdani
Kënga e shpirtit tuaj prej maja malesh vinte.
Kuq e zi Tirana, vesh me trëndafila
Zbritët qiell i ndezur si yje të zjarrta,
Gëzimi me lot thurur, atdheu i përkulur
Gjirin det e hapi për bronzet e arta.
