Lumi im po zgjohet
Gurgujt po shfryjnë zemëratën e heshtur prej vitesh
Ujërat po këndojnë mallshëm
Lumi im po zgjohet
Peshk të kuq lëvrijnë
në pasqyrën e ujërave
Valet e pabindura
shplajnë me gjuhën e tyre mistike
buzët e brigjeve.
Lumi im po zgjohet
nën ura të ndritshme nga dielli
Sy të dashuruarish
pikojnë ndër vezullime
Dhe lumi riosh shkruan romancën e tij.
Lumi im po zgjohet
që kur e mirosa me vargje kushtimi
Thinjoshi Drin po përlarget
Po zbohet heshtja
Brigjeve po vjen jetësimi.
Lumi im po zgjohet
Trupi i tij i gjatë derdhet në pafundësi
Nuk dihet gjeneza e tij ujore
Nuk ndërmendet kurrë
as vdekja e tij.
