-Fatmir R Gjata
Ç’rëndësi ka të mbash ditar
kur ditët janë të njëllojta
Dielli ngrihet e bie, retë pregatisin shiun,
dhe loti bëhet gati të bjerë e të ndaloj në cep të buzës.
Më mbetet ta lëpij e të shkoj
Të ulem nën shelg buzë lumit
Nëse ka akoma një vënd të tepërt.
Çfarë duhet një poezi më shumë për mallin
kur çdokush e ndien pa lexuar vargjet
Mjafton titulli,
pastaj mund t’i vësh gërmat rrëmujë
alfabetin me rradhë
Ose më mirë; zanoret
Të klithin vetmuar.
Nuk është kohë për ditar
kur flasin lotët e qajnë fjalët
e pemët shkëmbejnë lulet e para
për të uruar stinën e re.
Ç’rëndësi ka malli!!??
askush nuk e sheh shkallmin e shpirtit
Të gjithë kanë nevojë të shohin
trupa të bukur, buzë mishtore,
buzëqeshje e trille
kështu që mund të bëjnë selfie
në buzë mbrëmje pendese.
E ndoshta do gjejnë ditarin e grisur
pranë kanaçeve të birrës
aty ku u deha për herë të fundit.
