Emrin tënd thërras në gjumë ,
Si përherë i dashuruar .
Të kaloj një ditë është shumë,
Kush të do më shumë se unë ,
Lule , moj, e lulëzuar ….
Hap petalet të t’i puth ,
Dielli pa perënduar …
Nata është e gjatë , e ftohtë ,
Hëna zbehur , zvogëluar ..
Ti në ëndrra fluturon ,
Unë pranë teje rri i zgjuar .
Dhe në rëntë pakëz borë ,
Ca kristale vezulluar ,
Do shkëlqejnë në sy e flokë ,
Ëndrrën për të zbukuruar .
Nata fsheh mistere plot ,
Nata për të dashuruar ..
Trupi mbeti vajzëror
Dhe portreti i pandryshuar .
Është Dhjetor, moj , është Dhjetor ,
Sa dhjetorë pa ty kanë shkuar …
Emrin tënd thërras në gjumë ,
Dy- tri rokje vargëzuar ..
Është Dhjetor , moj, është Dhjetor ,
( Ah , kjo botë kaq e trazuar. )
Fluturzat kërcejnë përkorë ,
Valsin që s’ka të mbaruar …
